Ակնեն և հոգեբանական առողջություն․ գիտական փաստեր և իրական կապեր

Ակնեն պատկանում է մաշկային հիվանդությունների առանձնահատուկ խմբին՝ հոգեսոմատիկ դերմատոզներին, որոնց դեպքում մեծ դեր են խաղում հոգե-էմոցիոնալ խանգարումներ։ Դա պայմանավորված է “արտաքին տեսքի թերության” խնդրի հետ: Ցանավորման էլեմենտները, որոնք տեղակայվում են մաշկի բաց հատվածներին՝ դեմքին, կրծքավանդակի վերին կեսին, մեջքին, դրսևորվում են վառ բորբոքային հագուցիկային և թարախաբշտիկային տարրերով։ Սրանք կարող են ավարտվել բազմաթիվ սպիների և գերգունակային բծերի ձևավորմամբ և վատթարացնել բուժառուի արտաքին տեսքը՝ նրանց պատճառելով ոչ միայն ֆիզիկական, այլև խորը հոգեբանական տառապանքներ։

Ակնեով հիվանդները ցուցաբերում են ամենաբարձր մակարդակի տագնապ և դեպրեսիա՝ համեմատած այլ բժշկական պաթոլոգիաների հետ։

Դեպրեսիան և կյանքի որակի վատթարացումը ավելի արտահայտված են ակնե ունեցող անձանց դեպքում, քան ատոպիկ մաշկաբորբ, թեթև և միջին աստիճանի ծանրության պսորիազ կամ օջախային մազաթափություն ունեցողների համեմատ։

Ակնեով մարդկանց մաշկում հայտնաբերվել է նյարդային վերջույթների բարձր խտություն և P նյութ արտադրող նյարդերի ավելացած քանակություն: Հենց այս նյարդաբանական առանձնահատկությունն է, որ մեր մաշկը դարձնում է առավել զգայուն սթրեսային գործոնների նկատմամբ։

Երբ մենք սթրեսի մեջ ենք, օրգանիզմում բարձրանում է կորտիզոլի մակարդակը։ Այս հորմոնը՝

• Ուժեղացնում է բորբոքային պրոցեսները
• Բարձրացնում է ճարպագեղձերի ակտիվությունը
• Փոխում է անոթների տոնուսը

Հոգեբանական ազդեցություն
Կլինիկական դիտարկումները ցույց են տվել, որ ակնեի ազդեցությունը հոգեկան առողջության վրա պայմանավորված չէ ախտահարման ծանրությամբ։ Թեթև ձևերը երբեմն կարող են առաջացնել ավելի խորը հոգեբանական ապրումներ, քան ծանր դեպքերը։

Մասնագետները պնդում են, որ ակնեի արդյունավետ բուժումը պետք է ներառի երկու ուղղություն՝

Մաշկաբանական բուժում՝ ուղղված բորբոքային պրոցեսների կառավարմանը
Հոգեբանական աջակցություն՝ ուղղված տագնապի և սթրեսի հաղթահարմանը
Այսպիսով, ակնեի ռացիոնալ բուժումը նպաստում է ոչ միայն թարախաբշտիկային ցանի լավացմանը, այլև քանդում է ախտաբանական շղթան, ինչը թույլ է տալիս հիվանդներին ձեռք բերել հոգե-էմոցիոնալ կայունություն, բարձրացնում է վստահությունը, ինքնագնահատականը, ներդաշնակություն է ստեղծում միջանձնային և սեռական հարաբերություններում։ Հետևաբար, ժամանակին նշանակված և ճիշտ ընտրված ակնեի բուժումը, բացի մաշկաբանական արդյունքից, նպաստում է կյանքի որակի մակարդակի բարձրացմանը։

• Խուսափեք քննադատական մեկնաբանություններից
• Ցուցաբերեք հասկացողություն և աջակցություն
• Քաջալերեք մասնագիտական օգնության դիմելը
• Հիշեք, որ ակնեն անձնական հիգիենայի խնդիր չէ

ՀՀ ԱՆ Մաշկաբանության Ազգային Կենտրոնում մենք առաջարկում ենք անհատականացված համալիր մոտեցում՝ հիմնված միջազգային փորձի և նորագույն գիտական հետազոտությունների վրա։ Մեր նպատակն է օգնել ձեզ հաղթահարել ոչ միայն մաշկային խնդիրները, այլև վերագտնել հոգեկան հավասարակշռությունն ու ինքնավստահությունը։